Julle ken nou al my Gracie. So week gelede wag sy my in en vang my onkant met ‘n lening wat sy by my wil maak.

Ek is nie vreeslik gestress nie, sy leen tydige en ontydig ‘n R100. 00 hier en R100. 00 daar, wat sy weet ek in elk geval nie gaan terugsoek nie. Maar die slag gaan sy groot en toe sy die bedrag noem val ek amper om. Hoe nou Grace, R4000.00 sommer netso?

Grace, glo dit of glo dit nie ek het dit rerig nie ~ daai huis, jy weet daai een in die Kaap, hy eet rerig al my geld op, rerig. Jy laat my sleg voel, want jy kyk vir my of ek jok, maar ek jok nie.

Ek maak oor en oor somme en ek weet ek moet amper lone en als wat met mens se eie besigheid te doen het, betaal. Die huis is so te sê klaar, maar ai, net gou daai laaste paar dingetjies wat letterlik duisende beloop as jy dit bymekaar tel. Waterwise tuine in die Kaap is flippen duur, en dit is waarmee ek nou besig is om die huis gereed te kry om dit in die mark te sit.

Ek is naar en ek voel sleg omdat sy my dit NOU vra – ek voel sleg, en sê sy moet bank toe gaan. Ek het net nie nou R4000.00 nie.

Maar waarvoor het jy dit nodig?

Die seuntjie hy wil by die school tour gaan, hy sê hy gaan baie kwaad wees as ek nie die geld kry dat hy gaan nie. Die tour hy is na die Cape Town, en ek moet ook darem die klere kan koop dat hy mooi, nes die ander kinders lyk. Jitte Grace, hoe nou? Die maand, ek gaan nie so gou net daai geld vir jou kan gee nie. Hoekom het jy nie al lankal gesê nie dan kon ek beplan.

Die hele naweek voel ek sleg en ongeag wat ek doen, ek weet nie hoe gaan ek nou vir haar die geld kan leen nie, onsself is vas met die dat ons al ‘n hoop geld op die huis terugbetaal sonder dat ons enige iets op dit maak nie.

Ek voel sleg, en ek is kwaad vir haar dat sy half en half verwag dat ek die tipe geld uit my gatsak kan ruk om vir haar te gee.

Ek sê vir haar sy moet met haar kind praat, hy kan nie van haar verwag om net geld uit te haal nie, sy is ‘n huiswerker ons almal werk met ‘n begroting en ons kinders moet dit mos verstaan.

Vanmiddag toe ek by die huis kom moet ek vir haar ‘n werksbevestiging gee met haar salarisstrokie. Sy gaan nou bank toe en hoop die bank sal vir haar geld leen, want haar seun sê as sy nie dat hy saam met die ander kinders op die toer gaan nie, gaan hy homself ophang.

Goeie hemel, wat nou! Is dit emosionele afpersing of moet sy dit ernstig opneem? Sy sê vir my haar kop is seer en so ook haar nek. Gracie, dit is die stress en daai groot kind wat al vir hoeveel jaar in grd 12 is, is net besig om jou oor die afstand te stoot. Kinders moet verstaan as daar nie geld is nie, is daar nie geld nie.

Weer wonder ek of ek nie oë moet toeknyp en dit op my kt kaart vir haar maar moet gee nie, terselfdertyd voel dit of sy my ook aan die afpers is. Ek het dan nou gesê ek kan haar nie help nie!!! Ek het wel genoem as ons huis verkoop sal ek haar verseker met iets help om haar net ook so hupstootjie te gee.

Later bel sy my en sê die bank wil nie vir haar geld leen nie want sy werk by verskillende plekke, weer betrek sy my, wat is dit?

Ek noem aan haar dat ek al haar werkgewers se loon op een betaalstaat sal sit en dan moet sy dit maar weer bank toe vat. Maar ek dink nogsteeds sy moet die kind net sê, sy het nie daai tipe geld wat die ander kinders se ouers het nie! Hulle is gewone middelklas mense sy is ‘n huiswerker!! Haar kind gaan na ‘n Moslem skool in Erasmia, die hemele weet waarom, want daar is ‘n hoërskool twee blokke van haar huis af. En hy sou heelwaarskynlik al klr met grd 12 gewees het as hy in sy moedertaal skoolgegaan het. Maar dit daar gelaat.

En steeds voel ek skuldig, moet ek, of moet ek nie? Maar ek besef ook dat sy my teen R50.00 pm gaan wil terugbetaal en huidiglik kan ek dit nie doen nie, al wil ek hoe graag.

Is ek die slag verkeerd met ‘n kind wat eintlik al ‘n grootmens is en haar emosioneel afpers, of moet my nee, net my nee bly? Help my asb hoe gaan ek die ding benader? Moet ek net die geld gee, en dan sien die kind dit is hoe jy geld uit jou weerlose ma tap, jy dreig haar met selfdood, of gaan ek dit nie doen nie? En dan vir maande hierna met ‘n Gracie sit wat als behalwe grace vir my gaan inhou hierby my eie huis.