Gistermiddag toe ek by die huis kom, vind ek Gracie al neurie’ende en singende. Ek verwonder my altyd aan die feit dat hierdie vrou wat rerig ongeletterd is, en net ‘n huishulp al vir donkie jare vir my en ander gesinne is, nog kan sing.

Sy is altyd opreg bly om my te sien en uit te vra oor als – dit is altyd, hallo tannie, hoe gaan dit. Goed dankie tannie Gracie, goed met my ook soos met jou.

Goed, net om haar te sien en te hoor, so tevrede met bitter min. ‘n HOP-huisie, waarin sy haar eie seun en twee van haar kleinkindertjies grootmaak – met van die volwasse kinders in die agtererf in hul “shacks”.

Sy het ekstra gelukkig gelyk, so half en half ‘n gloed om haar gehad – asof sy bottels en bottels Colloidal Silver gedrink het.

Ek gaan nou nou by Ackermans, ek het die mooiste dress gesien – tjiep, hundred and seventy. Djy, djy moet gaan kyk by Ackermans, hulle het die mooiste dresses en hy is nie eers so duur nie. Saterdag is dit die soccer, my seuntjie hy speel soccer by Mamelodi en ek, ek wil mooi lyk want ek gaan hom cheer.

Netso bietjie agtergrond, haar seun is nou in grd 11 en in ‘n Moslem skool in Erasmia – maar boeta, die kind eet, slaap en drink sokker. Hy is altyd die goalie, hy speel vir sy skool in die 1ste span en dan speel hy ook in sy buurt se span, nl Olievenhoutbosch. Hy kry die een na die ander trofee.

Ek is saam met Gracie opgewonde oor sy vlg sokker wedstryd die Saterdag in Mamelodi, en dit is spesiaal vir die dag wat sy die mooi dress by AC-Kermans wil gaan koop. Jong Gracie, dit is so mooi, al die grootmense in die sokker, hulle gaan kyk en dan hulle soek die nuwe jongspelers vir Kaizer Chiefs ens. En as hy dan goed is gaan hy nog vir Bafana Bafana speel – en hy gaan vir sy mamma sê: mamma, ek is nou ryk, jy is nie meer die domestiek nie!  Gracie, wie gaan dan na my luister as ek huil omdat die kinders my hart seermaak, wie gaan my troos as A-M lelik was met my, wie gaan vir my sê? Los hom, djy moenie worry nie, eendag as die mamma nie meer hier is nie, hy sal weet en dan dit sal sy beurt wees om te huil. Sy lag kliphard vir my en sê: ek, ek gaan nie die werk los nie, maar ek gaan by die pesnioen hierby djou, jy moenie worry nie. Maar wanneer my seuntjie hy sal die geld kry vir die soccer?  Hierdie mense wat hom hiernatoe en daarnatoe vat vir die sokker, hulle wag dat hy klaarmaak met skool en dan gaan jy sien, die ander groot sokkermense hulle gaan hom soek, en vir hom baie geld gee.

Met die ruk sy haar selfoon uit om vir my te wys waar hy staan met sy trofee en ‘n goue medalje. Waar hy as goalie uitstaan tussen die ander spelers, Oe Gracie hy is die mooi, mooi kind! Sien djy, hy het my slippers aan wat jy vir my vir my bifday gegee, het laasjr. Waaragtig, daar staan die kind met een breë glimlag tussen die ander spelers met sy ma se pantoffels aan, ek kon my oë nie glo nie. Gracie, speel hy die sokker met jou pantoffels? Weer lag sy kliphard? Nee man, ek sal hom “moer”, hy trek dit net aan as hy klaar gespeel het, want sy voete hy is moeg, soos myne as ek die dag klaargewerk het.

En dit is met die gesprek wat ek my dag op ‘n hoogtepunt afsluit. Ek en die brakke gaan laai haar gou by die taxi-staanplek af, en ek besef ek het so baie om te leer van hierdie ongeletterde vrou in my lewe, hierdie vrou wat altyd sing, ongeag wat die lewe na haar kant toe gooi, met haar ZCC speldjie TROTS vasgespeld op haar bors, wonder ek, Here, sy gaan seker eendag direk hemel toe, al verstaan sy op die beste van tye niks van U nie, sal sy sekerlik eendag U genade smaak, die dag as sy hierdie tydelike lewe met haar ewige verruil? SY KEN VAN SING SELFS IN DIE DONKERSTE DONKER TYE, WAAR SY ‘N KIND AAN DIE DOOD MOES AFSTAAN OMDAT NIEMAND OMGEE AS JY NET ‘N NR IS. Sy weet van gelukkig wees saam met ‘n kind wat in ‘n liefdesverhouding met sy sokkerbal staan – sy maak my nederig voel in haar teenwoordigheid…

Advertisements